ذا العقد كان مليئ بالألعاب الاسطورية اللي ما راح ننساها
والألعاب اللي كانت بتكون سبب في كسر الكنترول
وراح اعتمد على أشياء كثيره منها
جزء واحد من كل سلسلة، مستثني العاب الجوال
والالعاب اللي راح اذكرها العاب سيئة لدرجة أنه ما احد
راح تعجبة، يعني مافيا 3 يمكن تعجب احد
وهنا نقول خلونا نبدأ
⊰✫⊱─⊰✫⊱─⊰✫⊱─⊰✫⊱─⊰✫⊱
سونيك بووم
صعب تسوي لعبة أسوأ من سونيك 2006
سيجا قدرت تسوي أسوأ، ومن نفس السلسلة
اللعبة مقتبسة من كرتون سونيك بووم
الغريب أن رسوم الكرتون أفضل من رسوم اللعبة نفسها
واللعب ممل من كل ناحية
الالغاز سهلة، كأنها الغاز اطفال
المشاهد يرفعون مستوى اللعبة شوي
نظام الضرب ممل، كل شخصية تختلف عن بعضها
لكن الاختلاف مو مميز او بارز
سونيك فري رايدرز، سونيك بووم، سونيك فورسز
من أسوأ اجزاء السلسلة، اخترت واحد منها لهذا العقد
⊰✫⊱─⊰✫⊱─⊰✫⊱─⊰✫⊱─⊰✫⊱
دوك نوكيم فوريفر
بعد نجاح الجزء الأول، تم الإعلان عن جزء جديد
وصارت مشاكل كثيرة اثناء التطوير لدرجة أن تطوير
اللعبة استغرق ١٤ سنة، والنتيجة طلعت سيئة
تعرف لعبة دووم أفضل لعبة شوتر في الجيل، تخيل أنها سيئة
والحين تخيل أنها سيئة أكثر من السوء اللي تخيلته
هذي هي دوك نوكيم فوريفر
نظام لعب عادي، بدون تنويع، اعداء سيئين
كوميديا ضعيفة، تحكم سيارة سيئ، وميني جيم أسوأ
إذا الشوتر سيئ خلوا اللعبة بدون مشاكل تقنية على الأقل
كيف لعبة يكون مدة تطويرها ١٤ سنه ولا يكون فيها شيء زين
⊰✫⊱─⊰✫⊱─⊰✫⊱─⊰✫⊱─⊰✫⊱
فول اوت 76
شي يزعل لما سلسلة قوية مثل فول اوت
يكون لها لعبة سيئة مثل ذي اللعبة
ترك طور التختيم والتركيز على الاون لاين كانت فكرة غبية
الاشياء اللي نحبها في فول اوت 4 موجودة لكن ما لها فايدة
المهمات متكررة وسيئة لأبعد الحدود
ابديت وراء ابديت وللحين سيئة
اللعبة نزلت في ٢٠١٨ "المفروض جلتشات ولودنج اقل"
وصار العكس، جلتشات واخطاء تقنية كثيرة
ولودنج يطول "يطول أكثر من العاب جيل PS2"
⊰✫⊱─⊰✫⊱─⊰✫⊱─⊰✫⊱─⊰✫⊱
سكيب ديد ايلاند
لعبة اختصرها بكلمة وحده (ملل)
نظام الضرب ثقيل وممل، وتخفي جداً سيئ
وأنت تتمشى احتمال يضربك فخ يعكر مزاجك
الأسلحة اغلبها زينه، لكن من الأسلحة السيئة المسدس
الزومبي يكون واقف مكانه، وينتظرك تعطيه هيد شوت
رغم أن ما فيه مشاهد كثير، الشخصيات تمثيلهم سيئ
وعلى النهاية، المشاهد تصير أسوأ وتمثيل يكون أسوأ
اول ١٠ دقائق هي افضل شي فاللعبة، الباقي ملل
⊰✫⊱─⊰✫⊱─⊰✫⊱─⊰✫⊱─⊰✫⊱
سلاحف النينجا
اللعبة فيها أكثر من شيء يخليك ما تلعبها
تصميم مراحل متكرر، ما فيه الا ٣ تصاميم
(شارع.قطار.مجاري)
تلعب بواحد من السلاحف والباقي يتحكم فيه الكمبيوتر
والكمبيوتر غبي؛ ما يهتم إذا مات، ويستخدم الحركات المميزة في أسوأ المواقف، واللعبة سهلة لدرجة أنك مستحيل تخسر
الزعماء اللي في اللعبة كلهم سيئين، خاصتاً الزعيم الاخير
هو اسهل زعيم
⊰✫⊱─⊰✫⊱─⊰✫⊱─⊰✫⊱─⊰✫⊱
مايتي نمبر ناين
انا ما اعرف إذا فيه العاب سيئة لميجا مان
لكن أكثر جزء برز من ناحية السوء هو هذا الجزء
الزعماء فاللعبة كلهم سيئين، وتصميم المراحل برضوا سيئ
التحكم غبي، وإذا هزمت زعيم تطلع حركة ما راح تستفيد منها، والحوار الغبي يبين أن الاستوديو ما يهتم
الرسم يعتبر أسوأ رسم في السلسلة
حتى أسوأ من اجزاء الجيم بوي
وأكثرنا يعرف أن سلسلة ميجا مان من السلاسل الصعبة
لكن ذي المره اعطونا لعبة سهلة بدون تحديات
⊰✫⊱─⊰✫⊱─⊰✫⊱─⊰✫⊱─⊰✫⊱
ذا اوردر
كيف جهاز مثل بلايستيشن 4 يحصل على حصرية بهذا السوء
اللعبة أكثرها مشاهد وما تقدر تطمرها (تكرار. الالوان الغامقة. تخفي مبسط. مدة اللعبة ٦ ساعات)
أنت تذبح في مكان صغير واللي ضدك مكان كبير، اللي ضدك أغبياء وخاصتاً ألي عنده شدقن على طول يركض لمك
الجرافيك حلو لكن الالوان ميته
والشاشة مأكولة من فوق وتحت
ومدة اللعبة قصيرة ٦ ساعات
غلطة كبيرة أن اللعبة ذي تكون
حصرية على أفضل كونسل في الجيل
⊰✫⊱─⊰✫⊱─⊰✫⊱─⊰✫⊱─⊰✫⊱
ليجو مارفل افنجرز
اللعبة ذي نزلت في ٢٠١٦
نفس السنة اللي صدر فيها فيلم كابتن امريكا سيفيل وور
الاستوديو يعرف أن اللعبة سيئة، فيبون يستفيدون من حماس الناس للفيلم، بدال ما تتأجل ويخلونها أفضل
إذا لعبت ليجو مارفل اللي صدرت في ٢٠١٣
اكيد جاء فبالك أنها ما تحتاج جزء جديد
لأنها بتكون نسخة من الجزء السابق
وهذا الكلام صحيح
الشخصيات نفسها ما تطورت، الالغاز نفسها ما تغيرت
نظام الضرب ما تغير، الاعداء ما تغيروا،تصميم المراحل ما تغير
على الأقل خل الموت يأثر؛ من بداية تطوير العاب
الليجو من ايام البلايستيشن 2، والموت ما يأثر
⊰✫⊱─⊰✫⊱─⊰✫⊱─⊰✫⊱─⊰✫⊱
ترول أند آي
تقليد ضعيف للاسطورة ذا لاست جارديان
جرافيك ضعيف مع بطلين سيئين
لعب ممل من البداية الى النهاية
قصة ما تجذب، مع حوار سيئ
اللعبة ذي مثال ممتاز للمطورين
اللي يهتمون بالفلوس أكثر من المستوى
الغريب هو كيف نسخة الPC أسوأ من الكونسل
⊰✫⊱─⊰✫⊱─⊰✫⊱─⊰✫⊱─⊰✫⊱
فيفا 18
سلسلة فيفا هي أكثر سلسلة مكروة هذا العقد
طبيعي يكون فيه جزء واحد من فيفا في القائمة
كان اختيار صعب بين فيفا ٢٠ و١٨، وفي النهاية اخترت ١٨
والسبب هو أنه الوحيد اللي ماله ميزات جديدة
فيفا ١٧ نجحت نجاح كبير لدرجة أنه حتى اللي مو مهتم بسلسلة فيفا لعب فيفا ١٧؛ عشان طور القصة
أنك تستغل نجاح طور القصة في جزء سابق
وتحطه مره ثانية في جزء جديد ما يخلينا نهتم
من كثر ما فيفا ١٨ سيئة وخالية من الميزات
جمهور فيفا نفسه ما تكلم عنها، كأنها ما نزلت
⊰✫⊱─⊰✫⊱─⊰✫⊱─⊰✫⊱─⊰✫⊱
ابو خشم
اللعبة حصلت على ذم كافي من الجمهور
فراح اتكلم عنها بشكل إيجابي وسلبي بنفس الوقت
اللعبة تم تطوريها بدون اهتمام
حتى المطورين مو واثقين بلعبتهم
أعطوها لليوتيبر عشان يلعبونها ويمدحونها
كانت اللعبة تحتاج شوي اهتمام من المطورين
ليه ما اخذوا افكار من العاب ثانية وخلوها أفضل
ليه عالم اللعبة فاضي "يقدرون يخلونه حيوي"
ليه اللعب ضعيف "في القتال، والتحكم"
وسعر اللعبة غالي بزيادة
اتمنى يتعلمون من اخطائهم، وتكون لعبتهم الجايه أفضل
⊰✫⊱─⊰✫⊱─⊰✫⊱─⊰✫⊱─⊰✫⊱
ميتال جير سرفايف
اللعبة اللي نزلت وما احد أهتم أنها نزلت
حتى إذا شلنا عنها اسم ميتال جير راح تضل لعبة خايسة
الزومبي راح تعتبرهم أسوأ زومبي في التاريخ
حتى الزومبي اللي في ماين كرافت أحسن منهم
وقتالهم ممل، مافيه اي متعه عند قتل الزومبي
كل شي في اللعبة سيئ: القصة، الشخصيات، المشاهد
وإذا تقول عن عالم ذا فانتوم بين سيئ، فأنت ما شفت سرفايف
والمهمات ممله، ما تشجعك تعيد اللعبة
وإذا أنت شايف نفسك تقدر تعيد اللعبة مره ثانية
ترى لازم تدفع، إذا كنت تبي تختم اللعبة مره ثانية لازم تدفع
أسوأ DLC في تاريخ الالعاب
⊰✫⊱─⊰✫⊱─⊰✫⊱─⊰✫⊱─⊰✫⊱
امبريلا كوربس
أسوأ لعبة اون لاين في التاريخ
لعبة سيئة تقنين وفنين، وطريقة لعب بدائية مع تحكم سيئ
والجرفيك سيئ "كابكوم تقدر سوي أفضل"
إذا قالوا أن العاب الفيديو مضيعة وقت، راح اتفق
إذا شفت شخص يلعب هذه اللعبة لمدة نص ساعة
وشي غريب لما اقولك أنه تم إصدار هذه اللعبة
كإحتفالية لمرور ٢٠ سنة على سلسلة رزدنت إيفل
لعبة سوف تضل أسوأ العاب كابكوم "ولا تحاول اعطائها فرصة"
⊰✫⊱─⊰✫⊱─⊰✫⊱─⊰✫⊱─⊰✫⊱
ذا كوايت مان
وصلنا للعبة اللي كانت تحاول تكون لعبة مميزة
نظام الضرب مميز، لكنه ما يشتغل، وفيه مشاكل
فيه حوار لكن ما تقدر تسمعه؛ لأن البطل ما يسمع
المشاهد مره تكون واقعية، ومره يكون جرافيك سيئ
القصة تحاول تكون مميزة: الأحداث، الشخصيات
لكن لم تزبط معهم
الزعماء تقاتلهم بنفس الطريقة
وإذا هزمتهم ما تأخذ شيء يفيدك
المطورين حاولوا أنهم يسوون لعبة فريدة من نوعها
لكن وللأسف، اللعبة ما صارت مثل ما كان يبيها المطورين
⊰✫⊱─⊰✫⊱─⊰✫⊱─⊰✫⊱─⊰✫⊱
بلود باث كافكاز
اللعبة ذي تقلد هوت لاين ميامي
المشكلة أن تقليدها اعمى
الصورة قريبة لدرجة أنك راح تموت وما تدري من ذبحك
الحوار جدا سيئ؛ الصوت عالي، ترجمة سيئة، دبلجة سيئة
الألوان مزعجة، تحتاج نظارة شمسية عشان ما تعورك
عينك وأنت تلعب، والفريم ريت مو ثابت
وما تقدر تسوي استراتيجية او تسوي خطة
اللعبة تمنعك تسوي شي من ذولي
وما فيه صعوبة او تحدي، "عكس هوت لاين ميامي"
لعبة تأخذ جائزة أسوأ لعبة مقلدة فتاريخ
⊰✫⊱─⊰✫⊱─⊰✫⊱─⊰✫⊱─⊰✫⊱
داينستي واريورز 9
أكثر لعبة مخيبة للآمال بتاريخ
وما كنت متوقع أن بيجي يوم احط أحد اجزاء السلسلة
فمدونة مثل ذي، اعرف أن البعض راح يعتبرني ابالغ
لكن لا، اللعبة سيئة ولازم احطها في المدونة
فكرة العالم المفتوح فكرة لا بأس فيها، لكن العالم سيئ
الحوار صار أسوأ، القتال صار أسوأ، الشخصيات صارت أسوأ
لما اتذكر الأجزاء القديمة، راح اتذكر أني كنت اضغط ازرار بدون ما أوقف لين نهاية المرحلة، الحين كل اللي أسويه أني اركب حصان تحكمه سيئ، وأدور على أعداء عشان اقاتلهم بنظام قتال أسوأ من الأجزاء القديمة
والكو أب اللي يزيد اللعب متعه ما صار موجود
مع مشاكل تقنية مختلفة
وما ادري اضحك ولا ابكي؛ لأن اللعبة فيها أكثر من ١٠٠ DLC
يحاولون ينقذون اللعبة لكن ما فيه فايدة
⊰✫⊱─⊰✫⊱─⊰✫⊱─⊰✫⊱─⊰✫⊱
نيد فور سبيد باي باك
العاب السباق هذا العقد مو نفس متعة قبل
سلسلة نيد فور سبيد كانت محبوبة في العقد السابق
وفي هذا العقد صارت السلسلة مكروة، من الفانز وغير الفانز
تطوير السيارة الأسوأ في التاريخ
شخصيات سطحية ومملة، وقصة ركيكة
وعكس الاجزاء القديمة، الهروب من الشرطة ما فيه حماس
والمرحلة اللي استعرضوها في E3 هي أحسن مرحلة في اللعبة
⊰✫⊱─⊰✫⊱─⊰✫⊱─⊰✫⊱─⊰✫⊱
كرتون نتورك باتل كراشر
انا مستغرب؛ كيف لعبة مثل ذي وصلت للكونسل والPC
حتى إذا نزلت على المتصفح أو الجوال راح اعتبرها لعبة سيئة
نظام اللعب ممل "حتى إذا شفت شخص يلعبها"
الشخصيات ما فيهم فرق؛ يضربون بنفس الطريقة
الزعماء من الأسوأ فالتاريخ، كل الصفات الخايسة فيهم
قتالهم ممل، الزعيم الاول أحسن من الزعيم الاخير
وما فيه الا مشهدين، مشهد في البداية ومشهد في النهاية
والنهاية خايسة، صح أنها مقتبسة من كرتون لكن خايسة
حرفياً، ما فيه شي يخليك تهتم باللعبة
⊰✫⊱─⊰✫⊱─⊰✫⊱─⊰✫⊱─⊰✫⊱
توني هوك برو سكيتر 5
بعد ما كانت الاجزاء القديمة تنجح نجاح ساحق
الجزء هذا صار ينافس في قائمة أسوأ العاب التاريخ
الاجزاء القديمة كانت تعطيك تحديات ممتعه
عكس هذا الجزء اللي تحدياته ممله وما تشجعك تكمل
وعلى ما عرف أن اللعبة صدرت وما انتهوا الشغل عليها
والشي هذا سبب مشاكل تقنية الأسوأ في التاريخ
من كثر ما اللعبة فيها مشاكل تقنية ترفع الضغط
المفروض يرجعون فلوس الناس اللي اشتروا اللعبة
⊰✫⊱─⊰✫⊱─⊰✫⊱─⊰✫⊱─⊰✫⊱
ون تو سويتش
أسوأ لعبة انتجتها شركة نينتيندو في هذا الجيل
والغريب إنها اول لعبة حصرية على السويتش
والغريب أن سعرها ٥٠ دولار?!
هي لعبة فيها ٢٨ ميني جيم
أكثرهم خياس، وبعضهم فكرتهم غبية
الأفضل تشوفهم في اليوتيوب عشان تعرف
قد أيش الميني جيم افكارهم غبية
⊰✫⊱─⊰✫⊱─⊰✫⊱─⊰✫⊱─⊰✫⊱
wwe 2k20
قبل نزول التريلر، قبل نزول التقييمات، قبل نزول اللعبة
كنا متوقعين أنها بتكون أسوأ لعبة في تاريخ المصارعة
كل السلبيات تدل على أن 2K يبون ينزلون اللعبة بسرعة
التحكم المعقد، مع جرافيك أسوأ من الجزء السابق
كنت متوقع أن المشاكل التقنية راح تكون موجودة كالعادة
لكن كنت غلطان، لأن ذي المرة المشاكل التقنية اللي نعرفها
موجودة لكن مع مشاكل أكثر وأكبر
ودي ال سي لاشياء كانت مجانية على أيام البلايستيشن 2
أتمنى الكل يوقف شراء ألعاب المصارعة؛ لأني اتوقع أن الجزء الجاي راح يكون طور الرويل رامبل عبارة عن دي ال سي
⊰✫⊱─⊰✫⊱─⊰✫⊱─⊰✫⊱─⊰✫⊱
رايد تو هيل
أسوأ لعبة أكشن في التاريخ
قيادة الدباب، القتال، الاستكشاف، كلهم سيئين
الحوار مقرف ومستفز، ومتأكد إذا جبنا ولد عمره ١٢ سنة
يقدر يكتب حوار أفضل، وجرافيك متأخر خمس سنين
وهنا سلبية ثانية، كل شي في اللعبة متأخر، هي نزلت في ٢٠١٣
"السنة اللي كانت الشركات تتجهز للجيل الجديد من الألعاب"
وهم مقتنعين أن لعبتهم جاهزة
تقييم اللعبة على ميتاكريتيك ١٠٠/١٩
تقييم عالي بالنسبة للعبة مثل ذي
⊰✫⊱─⊰✫⊱─⊰✫⊱─⊰✫⊱─⊰✫⊱
نو مانز سكاي
لعبة تحاول تكون افضل لعبة من ناحية الاستكشاف
لكن ما فيه شي يستاهل أنك تستكشفه، كواكب متشابها
كوكب ما تقدر تنزل لمه عشانه حار، كوكب ما تقدر تنزل لمه عشانه بارد، نظام ضرب ضعيف بدون متعة او احتراف
تقدمك في اللعبة ما راح يغير شي، حتى إذا حاولت
تطور أسلحة او مركبات ما راح يتحسن شي
نو مانز سكاي لعبة تجميع
تجمع عشان سلاحك ما يخرب
تجمع عشان مركبتك تحتاج طاقة
وما تقدر تجمع كثير لأن الانفنتري ما يكفي
والتجميع نفسه ممل وسيئ وأكبر سلبية فاللعبة
مطور اللعبة مبسوط لأن الكائنات الموجودة في اللعبة أكثر من الكائنات الموجودة في الحياة الواقعية، لكن اشكالهم خرابيط
من بين كل الألعاب اللي ذكرتها، نو مانز سكاي أفضلهم
صار لها أبديت وصارت أحسن وجابت جمهور جديد
وأنا حطيتها عشان الأشخاص اللي لعبوها من اول يوم
وتفاجأوا بالمستوى الكارثي
⊰✫⊱─⊰✫⊱─⊰✫⊱─⊰✫⊱─⊰✫⊱
وبكذا يكون عرفت أسوأ ما طلع في هذا العقد
فيه العاب سيئة ما ذكرتها لكن حاولت اذكر المهم
عطني إعجاب وتعليق، وأنشر المدونة في كل مكان
تويتر، واتس اب، فيسبوك
0 التعليقات:
إرسال تعليق